Jendez lepo joan dira XVII. Leioako Umore Azokako orain arteko hiru egunak eta bizia izan da hartu-eman profesionala ere. Eta azken egunean ere asko izango da ikusteko: dantza, teatroa, zirkua, akrobaziak… Igandean ere izango da zerekin gozatua, beraz, 13 saiorekin emango baitiote nazioarteko eta bertako konpainiek merezi bezalako amaiera aurtengo edizioari.
Musika, ile apaintzaile bitxiak eta zirku garaikidea
Andaluziako Tresperté Circo Teatro konpainiak zabalduko du jaialdiko azken eguneko programazioa eguerdian eskainiko duen “Oopart: historia de un contratiempo” emanaldiarekin. Grabiatearen legeak desafiatzen dituzte artistek estetika zainduko ikuskizun horretako akrobazia, jauzi eta baskularekin.
Cía. Delá Praka konpainia brasildar-frantziarrak aho zabalik utziko du ikuslea akrobazia, dantza eta capoeira uztartzen dituen “Nois Um” emanaldiarekin. Tsubasa Watanabe japoniarrak ere bisitariak harrituta utziko ditu “Hidden place” diabolo ikuskizunarekin, eta ikusgarria izango da Sainete Compañía euskal taldeak eskainiko duen “Lo que nos dejaron” zirku garaikide, malabare, soka eta oreka saioarekin.
Ausartenek ere izango dute aukera beren burua neurtzeko, musika eta ile apaintze artistikoa uztartuko baititu Sienta la Cabeza konpainiak. Burua jokoan jarri nahi duen orok izango du aukera Fafá Franco ile apaintzailearen orrazkera original eta ezinezkoak frogatzeko. Kaleak musikaz beteko ditu Jazz Combo Box taldeak, bere musika tresneria guztiarekin, eta baita erabat originala eta ezezaguna den instrumentu batekin ere: scratchphone-arekin.
Luzatu egingo da festa
Lehenengoz luzatuko da jaia igande gauera arte Umore Azokan. “Festak asteburua amaitzen den arte iraun dezan nahi dugu”, azaldu du jaialdiko zuzendariak. “Orain arte igande eguerdian amaitzen zen ikuskizunen programa, baina aurten, Kalian Hiri Kulturgunea elkartearekin elkarlanean, piknika, emanaldiak eta bestelako ekitaldiak izango dira Pinosolo parkean igande gauera arte”. Esaterako, Leioako Musika Bandak kontzertua emango du Diego Galáz musikari eklektikoarekin batera. Zerra, biolin-tronpeta eta betelako musika tresna ezohikoak jotzeko duen gaitasunagatik da ezagun Galaz eta Leioako musikariekin batera arituko da.
Umore Azoka Sariak
Igande eguerdirako jakinaraziko dira Umore Azokak aurten saritutako hiru taldeen izenak. Kale ikuskizunik onenaren saria (trofeoa eta diploma), Euskadiko kale ikuskizunik onenaren saria (trofeoa eta diploma) eta artista/ikuskizun gazterik onenaren saria (Bere hurrengo emanaldia prestatzeko Hameka-n egoitza artistikoa).
Larunbata gauean bildu ziren azken erabakia hartzeko epaimahaiko 7 kideak: Filgi Claverie (Hameka eta Lapurdiko Harri Xuri sorkuntza fabrikako arduraduna), Gerald Fannon (San Cugateko Teatre-Auditori jaialdiko arduraduna), Jordi Gaspar (Reuseko Feria de Circo Trapezi jaialdiko eta L’Estrucheko La Vela zirko egoitza zentroko arduraduna), Anna Giribet (Fira Tárrega jaialdiko programazio teknikaria), Elena Ros (Ikuskizun ekoizle eta banatzailea), Nando Piñeiro (Donostia kulturako Egia-Gasteszena-ren programatzailea), eta Javier Alcorta (Araiako Humore jaialdiko zuzendaria).
Thanks for putting LET’S CIRCUS IN THE ANNOUNCMENT